Minning um Birgittu Pálsdóttur

Hún Birgitta hefur kvatt þennan heim. Fyrir okkur sem þekktu hana kemur fyrst upp minningin um jákvæða, káta og lífsglaða konu sem geislaði út frá.
Við sem störfuðum með henni í Brautinni – bindindisfélagi ökumanna viljum þakka fyrir hennar óeigingjarna starf fyrir félagið. Í mörg ár var hún drifkraftur í að undirbúa og halda Ökuleikni á Siglufirði. Sjálf var hún frábær bílstjóri og varð meðal annars Íslandsmeistari kvenna í Ökuleikni árin 1997, 1999, 2003, 2004 og 2009.

Hún var mikill bílagrúskari og er það undirrituðum minnisstætt þegar við mættum á Siglufjörð til að halda Ökuleikni eitt árið og bönkuðum upp á hjá henni. Þá heyrðist kallað úr kjallaranum: „Ég er hér niðri“ og viti menn, þá lá hún undir VW bjöllu sem hún var að rífa í spað. Þessir bílar voru sérstakt áhugamál hennar og hún lagaði ófá slíka bíla og byggði upp með góðum árangri.

Nú þegar að kveðjustund er komið viljum við í Brautinni – bindindisfélagi ökumanna votta aðstandendum samúð okkar og ítreka þakklæti okkar fyrir hennar störf í þágu félagsins. Minningin um hana mun lifa í hjörtum okkar.

f.h. stjórnar Brautarinnar – bindindisfélags ökumanna
Einar Guðmundsson formaður